絲絲講場：友邦：港人寧hea懶理積金

錢係自己嘅，照理應該上心啲，不過，友邦信託行政總裁謝佩蘭（Bonnie）同絲絲分享一個有趣發現，原來港人每月平均用喺上網、煲劇嘅時間足足有35小時，反而每月投放於管理強積金嘅時間平均只有3小時！根據絲絲對朋友嘅觀察，上網、煲劇嘅時間就有多無少，但用3小時去管理強積金，已經係難以置信嘅多！

其實，若然打工仔要轉會，咁每個曆年都只可以轉一次，講到尾，只要的起心肝，唔好吓吓收到周年報表就丟埋一邊，睇吓自己所揀嘅組合，要唔要變吓陣，其實都唔需要好多時間呀！至於管理強積金？當然係留畀基金經理做啦！

今年收費未有得減

見到Bonnie，絲絲當然會為打工仔update吓友邦信託嘅情況，佢透露將推出動態資產配置基金，至於大家好關心嘅收費問題，由於去年十月底推咗優惠，暫時唔會減收費，亦都無意整合強積金計劃，及推出人民幣債券基金喎！