港股蛇年首個交易日喺正月大年初五開市，適逢當日又係西方情人節，加上港交所（00388）交易大堂大翻新後首次亮相，咁多喜事一齊嚟，港交所亦都好識做，應經紀要求，將今年抽嘅「特別版」利是，除咗「金牛」外，仲加埋「大牛」，等出市經紀可以碰吓運氣，逗多封大利是！
話說港交所派畀「紅衫仔」嘅利是一向都係廿蚊，由舊年龍年開始已「加碼」至50蚊，舊年仲玩驚喜，每二十封利是就有一封「特別版」，係「金牛」一千大元。
舊年就有人行運行到腳趾尾，連續抽到兩封「金牛」，哄動全場，當時就有經紀起哄提議，港交所下次應加多幾款銀碼，等多啲人抽中。
港交所今年決定順應「民意」，蛇年開市除咗有十封「金牛」抽外，仲加多咗廿封「大牛」五百元，即係話總共有30封大利是，準備出市員嚟攞！
依家出市員數目買少見少，換句話講，抽中大利是嘅機會都愈來愈高，各位出市員，蛇年真係財源滾滾來！
港交所主席周松崗今年係第一次主持農曆新年開市，會同李小加總裁一齊做「財神」派利是！雖然因為「夜期」單嘢，港交所同中小經紀意見相左，但一件事還一件事，港交所蛇年開市已邀請咗八大證券組織同立法會議員張華峰出席。