絲絲講場：信銀至尊廚神綠色「煮」意
近年個個都追求綠色低碳生活，信銀國際為咗介紹綠色生活，好有創意咁舉辦埋廚神大賽，8個管理層分4隊鬥廚藝，除咗色、香、味，最緊要係食材用本地有機蔬菜，又要用低耗能烹調方法。
比賽隊伍既然已經係高層，評判當然夠壓場又要公平，於是就由信銀國際行政總裁張小衛同資深大廚負責，結果就睇4隊煮出嚟嘅頭盤同主菜夠唔夠惹味。
兩隊高層齊攞冠軍
絲絲聽聞比賽時唔單止管理層落力，仲有幾十個同事幫手嗌加油，做啦啦隊打氣，同落場嘅管理層一樣花足心機打扮，例如帶埋綠色假髮，增加綠色感覺。
結果兩隊同分齊齊拎「至尊廚神獎」，其中一隊就係行政總裁辦公室總監劉月屏（Zoe）同資訊科技執行副總裁潘宇揚（Edmund）嘅「Zomund孖寶」隊，以一道「彩鳳朝陽」（雞扒配西蘭花）奪魁。另外一隊勝出嘅係由司庫陳鏡沐（Woody）同稽核總監李淑芬（Anna）嘅「Low Carb Kitchen」，用個低碳隊名襯晒成個活動主題。