好多大型企業每年都會搞員工「集思會」，話就話係「腦震盪」，但同時都會設計唔少難度極高嘅集體遊戲，訓練員工嘅團隊精神同領導才能。估唔到好大程度靠港股成交「食粥食飯」嘅港交所（00388）都有呢個慣例。聽聞年前嘅港交所集思會就曾試過要員工打wargame，平時個個斯斯文文，真係幾難想像揸起支槍嚟打wargame個樣！
好彩港交所啱啱搞嘅集思會，就冇咁辛苦。話說今次集思會第一次去咗將軍澳新數據中心度舉行（因為好多員工都未去過數據中心！），大家都知，新數據中心守衞有幾森嚴喇，又點可以隨處畀人「打野戰」呢！因此當日集思會，其中一個集體遊戲，只係叫員工分組圍在一起，但唔可用手嚟傳個「呼拉圈」；同埋打吓兵兵波咁，各人要打一下，不能中斷。對比打wargame，相對容易好多喎！
當日港交所好多高級管理層，好似行政總裁李小加等都有嚟，以佢平日咁鍾意踢足球做運動，就算打wargame都應難唔到佢！當日倫敦金屬交易所（LME）管理層都有嚟參加集思會。
除咗呢啲要喺限定時間內完成嘅動作外，集思會嘅重頭戲當然仲包括訓練員工嘅領導同思考能力。當日員工要按港交所今年嘅戰略計劃重點，分成多個小組，各自發表意見，員工之間又要互相評分，從而選出最高分得獎嗰組。
余絲韻