施政報告出咗，一早預咗未來幾年嘅樓宇供應會增加，如果配合埋美國可能會加息嘅憂慮，睇怕香港樓價好難再大幅上升。不過Prof.J認為政府雖然繼續大興土木，但地產商今次唔再係最大得益者，反而建築材料、傢俬等行業先會受惠。
之前都有提過喺香港股市入面，有好幾間本地建築材料公司，但一直都受到忽視，譬如主營樓宇建造及土木工程嘅新昌營造（00404）。Prof.J睇好本地建築業，係因為政府十大基建項目陸續招標、動工。而新昌係一間雙線發展嘅公司，喺香港從事建築、喺內地就從事高毛利嘅地產，公司嘅方針係希望用香港從事建築嘅穩定收入，來支持內地嘅地產項目，達到相輔相成嘅效果。
○七年新昌營業額有20幾億元、手頭訂單30幾億元，但呢五年公司規模不斷壯大，二○一二年營業額已飆升5倍，至逾100億元，手頭訂單增長到200幾億元。高增長係因為新昌除咗承辦好多政府工程項目外，更承接多項澳門項目。
Prof.J十分欣賞新昌嘅業務多元化，而且做政府工程一定收到錢，依家手頭上就有地鐵、高鐵、連接皇崗米埔隧道等建築工程，變相風險降低咗。以市盈率計估值最抵，不妨趁調整時吸納。繼續追蹤，出發！
香港大學電子金融服務榮譽助理教授 徐燦傑