華為近年走入國際舞台，仲畀美國話佢從事間諜活動，搞到創辦人任正非聞名國際。佢位千金叫孟晚舟（隨母姓），原來喺華為已經蟄伏廿年，佢嘅廬山真面目一直係個謎。
尋日佢終於公開以ＣＦＯ嘅身份接受內地傳媒嘅訪問，表現強悍風範。
孟晚舟九三年加入華為，至一一年先出任財務總監一職，喺管理方面佢堅持華為要有跨國公司嘅經驗。
喺個訪問入面，唔多唔少睇到佢剛強嘅一面，好似面對美國嘅「安全」問題，佢話美國嘅問題仍然係美國呢個國家嘅問題，唔會影響其他國家所做出嘅戰略選擇。
佢仲話，美國4G用戶每月資費七點五美元，3G每月一百一十五美元，任何一個以貿易保護為藉口干擾市場競爭嘅地方，最終受害嘅只會係消費者。
華為尋日公布業績，好多人都關心高層獎賞有幾豐厚，但原來華為整咗個「從零起飛獎」，核心管理層如果過去一年無達到底線目標，就要面對「零獎金」！
今次嘅得獎名單除咗有輪值ＣＥＯ郭平、孟晚舟、任正非、孫亞芳之外，仲有孟晚舟嘅老公徐文偉！