安踏（02020）上星期先公布同中國奧委會續約，繼續為中國體育代表團度身訂造領獎裝備，依家仲簽埋亞洲影壇天后舒淇做「FILA」品牌代言人，連環出擊，唔知會唔會令投資者加分呢？
近年內地體育用品已堪稱內「衰」股之首，但唔少內地本土品牌依然好有體育精神，繼續迎難而上，唔怪得仲有一、兩間大行不離不棄落力唱好。
今個年頭，安踏都尚算不負眾望，「冧莊」做中國奧委會合作夥伴呢個行業領導者嘅角色之餘，仲識得拍住中國奧委會大搞「奧林匹克公益合作聯盟」，將合作夥伴呢個名銜進一步發揮。
不過，市場投資者都係睇銷售成績多，所以安踏終於為旗下品牌「FILA」搵到舒淇做品牌代言人，宣傳「FILA」今年以「La Dolce Vita」（甜蜜生活）為主題嘅春夏季新品。呢個招數就實際得多，至少吸引到唔少男性眼球，望多兩眼張宣傳海報，分析員又可能會放長雙眼睇吓廣告成效，總之市場有talking point先啦。