絲絲聽聞新一屆理事會嘅就職典禮大約喺四月舉行，記得上一屆就職典禮暨證券商協會30周年，證券商協會破天荒搵到有「校長」之稱嘅聯交所前主席李福兆「出山」做嘉賓，而且大玩棟篤笑，令到台下觀眾拍爛手掌。唔知今屆就職典禮，有冇新噱頭呢？
名譽顧問多股壇猛人
其實證券商協會來頭絕非嘢小，除咗永遠榮譽會長係李福兆、王啟銘等外，原來證券商協會永遠榮譽顧問係前港交所主席李業廣，而港交所前行政總裁周文耀、港交所董事許照中等亦都係該會嘅永遠名譽顧問。咁多猛人坐鎮，怪唔得，證券商協會上次慶典，請得郁咁多城中名人，出席畀面派對。
以朱太喺股壇金魚缸嘅多年江湖地位，睇嚟今次就職典禮肯定過之而無不及添！