絲絲講場：渣打雙師人幣新書行善
人民幣國際化條路點走，唔只係中國嘅大事，仲係全世界嘅焦點，講得俗啲，食粥食飯都睇佢，渣打香港有兩個公認嘅人民幣專家——羅銘勤（Robert Minikin）同埋劉健恒，最近合作出咗本有關人民幣發展嘅書，有心研究呢個課題嘅人，又多一本參考書。唔好以為佢哋做副業賺版稅，實情係順手做埋善事。
人幣專家分享心得
本新書叫《The Offshore Renminbi》（離岸人民幣），羅銘勤依家係渣打香港高級外匯策略師，而劉健恒就係亞洲區高級經濟師，佢兩位經常出嚟介紹離岸人民幣業務嘅最新發展，由佢哋講解呢個題目，梗係駕輕就熟啦。
劉健恒話，佢哋兩個人喺過往幾年，經常去唔同地方介紹、解釋人民幣嘅發展，亦有好多人提出唔同嘅問題，例如人民幣會唔會取代美元、內地資本帳開放問題等，呢本書係集合咗佢哋呢幾年嘅經驗，同大家分享心得。
望2020前籌7.8億
兩名作者亦熱心公益，所有版權收入，都會撥捐由渣打香港同奧比斯共同發起嘅「看得見的希望」行動，協助患有眼疾嘅人士。行動目標係喺二○二○年之前，籌集1億美元（約7.8億港元）善款，至今已經籌到5,000萬美元，距離目標仲有一半路程。
余詩韻