香港有唔少上市公司都係家族企業，如長實（00001）、新地（00016）、恒基地產（00012）以及遠東發展（00035）等，仲要粒粒巨星，加埋佔咗差唔多港股四成市值，都咪話唔誇張。
點樣界定一間企業係唔係家族企業呢？幫襯開公司附近嘅茶餐廳算唔算？定係要好似翠華控股（01314）咁上市先計？從字面解說，家族企業就梗係要由家族擁有啦，並且該家族對企業嘅戰略方向有影響力。除此之外，仲要有家族成員參與營運，而且有傳承嘅安排，如「子承父業」等形式，讓後代參與企業營運。
外國有機構統計過，家族企業嘅總資產回報率（ROA）平均較非家族企業高6.65%，Prof. J認為，原因係家族企業嘅管理成本較低而決策效率較高，令佢哋可以迅速咁把握黃金機會。再加上經營成果係歸家族共享，利益一致，令到「政通人和」。既然企業經營理念同目標政策達致同步，自然企業向心力強，事倍功半。
不過，家族企業都有佢嘅問題，「裙帶關係，用人唯親」係中國自古以來嘅困擾，稍為處理不善就會造成「外戚為患」，令到家族同企業利益衝突。當家族利益凌駕企業利益嘅時候，企業就會無法獨立經營。嚴重者，「人治」重於「法治」，咁優秀人才就難以進入管理層發圍。
Prof. J相信投資者係樂於見到家族企業延續下去，因為一間成熟同架構穩健嘅企業，佢嘅股價會相對穩定，而且企業業務精神得以延續，市場對產品服務質素亦較有信心。繼續追蹤，出發！
香港大學電子金融服務榮譽助理教授 徐燦傑