康宏理財（01019）一向支持環保，早排推出環保及回收活動，尋日舉辦咗「素食星期一」，集團主席王利民（Quincy）仲話幾個月前開始逢周一食齋，希望可以將呢個理念推廣開去！
為咗響應社企Green Monday嘅活動，康宏為後勤員工搞咗個素食派對，向大家推廣綠色生活態度，提倡綠色飲食文化，聽講，員工反應都好熱烈，仲話估唔到食一日齋，已經為減少碳排放出咗一分力！
絲絲聽講Quincy和行政總裁馮雪心（Rosetta）早於幾個月開始，就各自展開咗「素食星期一」嘅習慣，唔怪之絲絲最近見佢哋好似fit咗啦！下一次見到面真係要求佢哋公開個素食餐單畀絲絲參考吓！
Rosetta同絲絲講，希望藉住素食午餐，鼓勵員工從生活細節着手，由每星期素食一日開始，展開綠色生活，減少碳足迹，最緊要係令自己健康啲！
講開又講，絲絲發現身邊朋友都係無肉不歡，真係好唔健康，大家記得要食多啲菜啦！