絲絲講場：陳啟宗：做香港人最好
全球熱衷於探討中國經濟機遇，好多人都恨不得快啲融入中資企業，搶佔中國大市場，不過，恒隆集團（00010）主席陳啟宗（Ronnie）就例外，話唔想同中糧集團董事長寧高寧、SOHO中國（00410）董事長潘石屹等交換身份，反而認為「香港人最好」。
Ronnie尋日幫亞洲金融論壇，負責做咗一個環節嘅主持，同場演講嘉賓除咗寧高寧、潘石屹，仲有身兼亞洲水泥（00743）董事長嘅台灣遠東集團董事長徐旭東，大家暢談中國經濟社會種種之後，有台下人士發問，台上四位老總如果可以互換身份，想做邊位嘅時候，經常喺微博發表意見嘅潘石屹就第一個回答換做寧總，寧總就客氣話，其他三人對比較自己好。徐總就話，Ronnie喺內地搞房地產多好。
大陸台灣唔少限制
Ronnie嘅答案就贏得全場最多掌聲，佢一開首就話，不要換做潘石屹，雖然對方好有錢，但有時都會被內地機構請飲茶；寧總身處國企，有唔少限制；台灣政府都會畀好多麻煩徐總，有一大堆問題。所以結論都係「香港人最好！」佢仲話香港嘅附加價值好高，叫在座嘅外國人要嚟香港開設辦公室再進入內地，聽到呢度，徐總都忍唔住講笑，提議Ronnie收番廣告費。