緬甸經濟呢兩年開放咗好多，絲絲嘅uncle都去咗幾趟傾生意，據聞一向被視為敏感產業嘅電訊業，亦將出現翻天覆地嘅巨變，緬甸政府原來正考慮為當地電訊服務引入競爭，一眾手機生產及電訊設備巨頭，將會一拚高下。
緬甸人口約六千萬，過往只有兩家企業包攬晒當地電訊服務，證券界引述緬甸政府嘅消息，話政府目前正草擬法例，打算引入五家新經營商參與經營。依家緬甸嘅手機普及率得5%，根本就係手機商從未開發嘅市場。緬甸政府舊年將發放手機智能SIM卡嘅相關費用大降72%，亦證明政府促進手機服務普及嘅決心。
作為智能手機兩大巨頭嘅三星與蘋果公司，內地嘅中興與華為，喺呢場爭奪戰當中，可以話係各有優勢。
不過原來台灣宏達（HTC）手上嘅王牌都唔講得笑，原來HTC嘅CEO周永明就係呢張王牌，生於五十年代嘅周永明，本來就係緬甸土生土長嘅華僑，直至八十年代至轉往台灣升學，及後並輾轉喺國際IT界發展。有呢個根源，HTC比起其他對手，更加同聲同氣喇！