絲絲講場：郭氏兄弟跑出哲理
依家呢個天氣，最啱跑馬拉松，據絲絲所知，好多大企業嘅高層，都有跑步嘅習慣，減吓壓。絲絲尋日參加咗個慈善馬拉松，跑跑吓見到有大人物出現喎，就係新地（00016）兩位聯席主席兼董事總經理郭炳江同郭炳聯，見到兩位郭生有姿勢有實際，相信平時都有跑開步keep fit。
郭炳江同絲絲講，運動可以減壓，尤其做咗跑步等帶氧運動後心情會特別好，所以佢一直鼓勵同事做多啲帶氧運動，出多啲汗，細佬郭炳聯就話馬拉松地點響西貢北潭涌，佢自己雖然第一次參加，但都覺得身心舒暢，話會考慮繼續參加喎。
「做人一樣要堅持到尾」
郭炳江仲講得好有人生哲理，話馬拉松係同自己比賽，考驗意志同耐力，中途會攰到想放棄，但只要一直堅持就一定可以跑到終點，達到目標，就好似做人一樣。佢提醒絲絲話：「長跑講耐力，保持均速最緊要，唔好受其他人跑得快影響，否則好易後勁不繼，甚至整親膝頭」。
新地過百人跑馬拉松
兩位老闆都參加，新地員工自然更加踴躍，一齊跑嘅新地員工同親友多達幾百人，齊齊完成十公里賽事全程，幫公益金籌款。今次馬拉松參與人數再破紀錄，共有超過2,000名跑手參加，比舊年多出超過三成，而新地旗下帝京酒店仲喺終點免費提供茶點招待。
余詩韻