踏入二○一三年，港股氣氛變得異常樂觀。有趣是，短短一個月，先有AIG 大手減持友邦保險（01299），之後再有私募基金凱雷終極一沽，賣出手上60億市值的中國太保（02601）。
凱雷高峰期揸貨五成七，今次沽完持股量降至零，按正常牌路，無再被沽貨出街增加供應風險，太保理應有炒上條件。但邢理強心諗，凱雷手貨十月底經已過咗禁售期，可等太保由十一月中低位23.25元，升到30.3元至出手批股，個半月升幅三成，忍耐力及時機掌握確係一絕。
以批股價計太保一三年內涵價值，比另外兩隻龍頭壽險股平保（02318）及國壽（02628）同期高12%及37%，堪稱貴絕內險股。君可見，凱雷一出手，成個內險板塊升勢都被消息降溫。
事件中也看到另一件事，太保累積升幅唔細，以批股規模一般4至6％折讓無走雞，最後瑞銀及高盛，竟然得2.3%至3.2%折讓咁辣條件，仲敢搶單批股生意返嚟。如果唔係對短時間搵到基金散到貨有十足信心，就係揭示，近年投行生意競爭真係比以前激好多，即使冒上身風險，依然要為搶生意爭崩頭。
INVEST 邢理強