絲絲一向都好欣賞啲事業型嘅女性，特別係一班內地企業嘅富二代接班人。佢哋個個都又靚又叻，將爸爸嘅生意打理得頭頭是道，照計應該有唔少裙下之臣。不過絲絲睇完雜誌先知，內地首富娃哈哈集團董事長宗慶后，身家成800億人仔，佢嘅千金，芳齡30歲嘅宗馥莉竟然驚爆自己從來都無交過男朋友。
早前宗馥莉接受雜誌訪問時自爆呢個消息，絲絲第一次睇仲以為自己眼花添啊！宗馥莉解釋，自己身為娃哈哈集團嘅第二把交椅兼未來接班人，平日自然忙到停唔到手，就連上流社會嘅派對都去唔到。而且有記者形容，可能因為屋企太有錢，所以宗馥莉都分唔清，到底追求者想同佢談情定傾生意。
其實內地企業女性繼承人嘅感情生活一向都係大眾焦點，因為呢班「駙馬爺」隨時成為另一位繼承人。
好似碧桂園（02007）嘅千金楊惠妍就嫁咗畀「官二代」嘅同學，除咗有地位之外，呢位好女婿更加利用自己嘅化學專業幫助集團開拓新業務，搞到岳父楊國強鬼咁開心。
睇嚟宗慶后除咗要管理集團業務外，仲要勤力啲幫個女搵番個好老公喇！