停牌股大慶乳業（01007）都算禍不單行，年頭通告竟然係「漏水」。公司尋晚刊登通告，話今年首個交易日（二日）早上，發現公司喺黑龍江大慶市嘅附屬公司大慶乳品廠區內辦公樓，因管道爆裂而搞到一樓至二樓水浸，集團財務、物流、行政兼工程部辦公室內嘅辦公設備、電腦及文件隨時報銷，今次真係屋漏偏逢夜雨。
內地冬天極寒，北方地區閒閒哋都零下二、三十度，估唔到連辦公樓暖氣管都唔多抵得住冷，加上管道老化，暖氣管爆咗都只可以怪自已「黑仔」。
弊就弊在，由於節日關係，大慶乳品廠原來仲要隔多兩日，先到當地公安機關報案，兼通知公司董事會。惟有希望大慶可以正面啲諗，視水為財、水浸滿屋即財神入屋啦。
另外，大慶報告會成立調查委員會，負責調查及向董事會提交正式調查結果、檢討有關文件保護的內部監控程序，最重要係評估是否需要為重要經營及財務資料作出額外備份。