絲絲講場：劉明康中大開班講《巴三》

好似去年全國政協會議嘅經濟組討論，當講到民間借貸問題時，佢直指背後有官商勾結嘅情況，其後又喺香港講內地有一定勢力嘅利益集團，或者會阻礙改革步伐。最近劉明康就應中大嘅邀請擔任講者，到時可能又會聽到佢語出驚人。

獲邀任傑出研究員

中大嘅全球經濟及金融研究所最近就請到劉明康出任BCT銀聯集團傑出研究員，而呢個研究所會喺下星期四至六（十七至十九日）舉辦「國際中央銀行家巴塞爾三研討班」，向「非G20成員國」嘅中央銀行家交流有關「巴三」嘅最新知識。

中大就保證，劉明康到時會分享佢多年經驗以及會有精闢見解。至於其他嘅講員都絕對唔失禮，包括前金管局總裁任志剛、前證券及期貨事務監察委員會主席沈聯濤、滙豐銀行亞太區總裁王冬勝等。

任志剛本身亦喺一○年時獲中大邀請加入中大研究所擔任研究員。

如果大家等唔切下星期四？唔緊要，下星期二中大會有個新聞發布會，到時劉明康會有份介紹研究所今年嘅活動，以及評論現今全球經濟嘅形勢，絲絲真係好期待。