日本央行行長白川方明任期將喺四月初屆滿，新任首相安倍晉三講到明無意繼續用佢，於是乎外界即時議論紛紛，邊個會係下任日本央行行長呢？其實絲絲都好有興趣知道，不過要坐央行行長呢個位，先要過財務大臣麻生太郎開出嘅多個條件，例如要深諳英語、有耐力等等，但暗示學者就不在考慮之列。唔怪之得白川無得留低啦！
麻生日前喺記招上，開出未來央行行長多個任職條件，如首先要英語talk得，因為唔想好似以前咁，貴為日本央行行長，與其他國家財金官員出席七大工業國（G7）及二十國集團（G20）會議時「口啞啞」。咁又係嘅，中國人行行長周小川英文就好talk得，一啲都唔失禮！
至於其他條件，其二就係要有擅於管理大型機構運作嘅經驗，事關央行行長除咗管理旗下5,000名員工外，亦經常要同政府官員斡旋；其三則係擁有鐵人般嘅耐力，年中經常到外地出席G7、G20等會議，面對金融危機時更要適應世界時鐘，克服時差，半夜三、四點隨時收到討論要事，這比高超智力更重要。而最後一樣就係要欣然接受批評。
麻生並且暗示唔多屬意學者做未來行長，咁樣嘅話，前朝官員，包括現為慶應義塾大學教授嘅竹中平藏，及曾為東京大學教授嘅日央行前副行長岩田一政都怕且冇機會囉。
咁樣計嚟，要符合晒麻生所開出嘅條件，好似就得番前財金官員、現為亞洲開發銀行行長嘅黑田東彥咋喎。更何況佢老哥本周初據傳啱啱至同首相安倍會面。不過，佢就禮貌式回應外界，強調冇同首相傾過央行繼任人咁話。信不信由你！
余詩韻