正所謂一年之計在於春，趁住今年港股交投熾熱，憧憬可以激活成個市場嘅氣氛，連一向以散戶客為主嘅耀才證券（01428）都密謀食大茶飯，主席葉茂林同絲絲傾開偈，佢大爆今年耀才嘅口號係「耀才大計，邁向國際」，就係要搶攻機構投資者嘅公司客，仲諗住引入中資背景嘅策略性股東，實行做大做強，一間本土嘅證券行做到咁大，都咪話講笑！
耀才近年積極進取，葉茂林話過去成功打響名堂，喺「修身、齊家、治國」之後，下一步梗係要「平天下」，所以今年諗住「開多瓣」，做埋機構投資者啲大客仔生意，依家已經密鑼緊鼓招兵。
雖然舊年耀才同交銀有啲唔愉快嘅經歷，但係無礙公司搵partner，佢亦都透露今年希望引入策略性投資者，最希望同中資合作，打入內地市場咁話，最緊要有協同效應。
葉茂林一向親力親為，記得之前佢同絲絲講過，夜晚瞓瞓吓覺都扎醒，因為諗到條橋，所以喺舊年十月、十一月就首創以分期方式推出股票供款計劃，點知真係畀佢捕捉到今次股市嘅升浪，認真犀利！
計埋計埋，至今有成幾百個客戶申請，交易亦達到幾千萬元，而且佢哋周不時都會調整計劃包括嘅股票，之前就加入咗幾隻A股ETF，遲啲仲會將供款期延長至三年，希望可以幫更多散戶賺到第一桶金。