華府同國會上個禮拜至喺最後關頭勉強避過墮崖，但發債上限危機又殺埋身，最近就有人建議美國財政部走法律罅，鑄造一個面值1萬億美元嘅白金紀念幣，然後存入聯儲局，即時可令當局多咗1萬億美元周轉，勢估唔到呢個奇想最近被炒到慶合合。
紐約民主黨眾議員納德勒上周話佢正認真推動鑄造白金紀念幣嚟化解財政危機，估唔到竟然一呼百應，截至周一晚上就有5,000人喺白宮網頁聯署支持，就連諾貝爾經濟獎得主克魯格曼周一亦喺自己《紐約時報》嘅地盤公開力撐。哈佛大學法學院教授特賴布同意呢個建議喺法理站得住腳，即使拎到法院亦難被挑戰。
不過，有共和黨議員就睇唔過眼，聲言會禁止呢個做法，仲形容咁做就等於用愛麗絲夢遊仙境中嘅鏡子去了解債務管理。白宮發言人卡尼亦回應，強調發債上限要用政治方式解決而唔係走去鑄幣，提醒國會加快達成協議。有專家仲話，若果真係咁做會削弱外資對美債嘅興趣。
無論結果如何，最開心嘅相信係喺前年夏天率先提出鑄造白金紀念幣構思嘅Orcam Financial Group創辦人羅奇，佢話勢估唔到呢個奇想竟然成為了主流討論。