舊年A股最後雖然食尾胡，但係唔計十二月，其實年內大部分時間都死氣沉沉，內地啱啱公布嘅上市公司高層財富榜，上榜富豪大部分都身家縮水，令到排名要重新執位。好似之前連續七年「霸」住榜首嘅蘇寧電器董事長張近東，舊年持股市值就唔見咗超過34億人仔，輸畀同樣係中小板公司嘅海康威視副董事長龔虹嘉，只可以屈居第二位。
海康威視算得上係舊年少見股價一路係咁升嘅股票，雖然龔虹嘉年內幾次減持套現，但係去到年尾，佢嘅持股市值仲有137.51億元（人民幣‧下同），成為二千幾間A股上市公司高層中間嘅「首富」。第二位嘅張近東，持股市值縮水到129.8億元，只係比第三位嘅比亞迪董事長王傳福多十幾億。
雖然今次和訊公布嘅財富榜淨係計以個人名義持有嘅上市公司股票市值，喺統計身家方面唔係好全面，不過就好反映到股市上落對呢班上市公司高層財富嘅影響。好似歌爾聲學董事長姜濱，舊年因為公司股價上升令佢持股市值急增咗六成，而財富縮水最嚴重嘅慈星股份董事長孫平范，就因為公司股價由超過30蚊跌到得9蚊，令到佢唔見咗60億人仔。
余詩韻