Market Insight：蒙牛乳業 逢低收集

星期一，如果拿着51隻股票升幅超過一成的名單睇睇，不難發現，資金已集中炒作一些久欠交投的蚊型落後股。相反，由藍籌組成的恒生指數，一月二日復市狂升655點後，高位表現有點呆滯，並連跌三日。細價股成為市場焦點，開始通街股神之時，有番咁上下股齡的，都知道汰弱留強遲早發生。在強勢股轉弱，不少二、三線超買嚴重下，本文已連日勸讀者不要追接火棒，昨日的迷你震倉，大家應該不感意外。

尋日要搵跌市原因，幾乎隨手都可搵出幾個。金管局三年來首次發債210億元，避免同業拆息過低，意味部分停留在銀行體系的過剩游資被抽走；私募基金凱雷，於十月底禁售期後，一直隱伏等機會，前日收市終於一次過把手上最後一批中國太保（02601）配股，套現62億元，消息一出，尋日內險股跌到七個一皮。

放大圖片

放大圖片

嚴重超買風險高

再者，尋晚美國企業季績期正式揭開序幕，估計打頭陣的美國鋁業（Alcoa）好大機會虧轉盈，只可惜綜合大行對整體美國上市企業去年第四季度的業績流於悲觀，反觀三大指數從十一月谷底反彈幅度唔細，萬一華爾街賓架有風吹草動，位處兩年高位、兼且海嘯後密集蟹貨區的港股，都咪話無風險。

回說太保，十一月中，股價才23.25元，與批股價30.3元相比，個半月時間累積三成升幅，若不是基金手上內險股嚴重短缺急於補貨，很難想像在現水平可以出現如此踴躍的認購。太保早前公布營運數據，去年首十一個月壽險及非壽險保費收入增長分別是0.2%以及12.3%，壽險部分表現中規中矩，如果比較新業務內涵值，卻比平保（02318）及中國人壽（02628）高兩至三成，凱雷清倉令陰霾消除的好處，應不足以抵銷估值稍稍偏高的客觀因素，而凱雷刻下沽貨，對內險股唔多唔少造成短期壓力，想捧場的，可以等29元附近至郁手。

拓鄉鎮兒童市場

即使大市走勢麻麻，投行為客仔搵落後股的活動依然持續，野村剛剛幫蒙牛乳業（02319）辦視像會議，讓管理層向基金經理講解未來五年大計，古勝八番嚟嘅內容主要係講拓展鄉鎮城市的兒童奶品市場，並更重視原乳供應的安全性，例如向中小奶農提供更多支援、強化內部監控、以及改善目前公關通報機制等等。

中糧集團接手之後，過去一年蒙牛走勢頗令人意外，不過係意外咁失望，大部分時間在20至25元之間浮沉，去年九月大市由兩萬點樓下愈升愈有，同期蒙牛卻由24.3元嘅高位，撻番落20元邊掙扎。

講到尾，市場一係炒復甦，一係揀市帳率折讓大的股份炒一轉，偏偏蒙牛兩個基本條件都冇，原來預期去年下半年的復甦，從管理層透露的營運數據，睇怕今年才出現，仲要假設改善產品結構成功，今年靠提高高價產品銷售比例，毛利率才會見到改善。在大市狂升之際，芬佬只爭朝夕，點會肯慢慢等？

由於一二年下半年業績持平，基數較低，在中糧積極執靚盤數下，蒙牛一三年恢復增長的機會始終較大，現價一三年市盈率16.8倍，較歷史中位數27倍低三成八，現水平揸佢，風險比其他當炒股細，無貨的可以諗諗。

呢期開完狂野派對嘅板塊都見疲態，好似里昂唱淡嘅安東油服（03337）急跌14%，連帶整個油田服務股板塊都受壓，華油能源（01251）下跌7%、宏華集團（00196）跌5%，巨濤（03303）跌8%。

長建直指50元關

反觀早前大升市表現斯人獨憔悴嘅食品股就先跌，康師傅（00322）同旺旺（00151）分別升4%及2%，而同樣被視為低啤打值股份嘅恒安國際（01044）同維達（03331）則分別逆市升1%及4%，既然資金回流防守性股份，睇落長江基建（01038）都有得諗，睇吓呢轉衝唔衝得穿50元大關！

古勝