今年新股集資王人保（01339）尋日終於正式登場，人保送畀港交所嘅禮物亦好有心思，係一隻閃令令嘅鍍金大象，除咗因為「金象」同「吉祥」嘅普通話發音相近之外。
據了解，人保今次嘅內部上市代號係「金象項目」，所以呢隻金象就有雙重意義喇！
港交所收金象做禮物，小股東都提早收聖誕禮物，人保不負眾望，第一日就升百分之七，每手賺二百四十蚊，大家應該好滿意。
可能好耐無大隻新股上市嘅關係，包括財爺同內地財政部官員等嘉賓、過百位「賓架」、同半百傳媒，未夠九點已經將舉行上市儀式嘅場地逼到水洩不通，當人保董事長吳焰揮棍敲響銅鑼之後，人保開市嘅股價已經拋離招股定價好多個身位。當逼近三點七元嘅時候，絲絲更加聽到「女股神」劉央興奮高呼，今次真係飲得杯落囉！