內地原奶供應商現代牧業（01117）今年九月中突然宣布換主席，61歲嘅創辦人鄧九強基於健康同年紀為由退落嚟，只留任執董，但尋日絲絲見佢喺股東會都幾精神，走嘅時候亦健步如飛。睇嚟卸任休養兩個幾月後，的確唔同。
至於同場現身嘅新任主席華裕能就同人相當好傾，就算之後仲有飯局緊接住，佢都同絲絲傾咗陣，佢話近排原奶有少少提價，主要跟玉米成本價格嘅波動而上。講到明年形勢，佢仲好有信心咁話，相信明年增長唔錯，因為依家內地仍缺乏優質兼安全嘅奶源。至於集團家陣嘅業務，亦按市場預期增速進行。
咁佢哋集團係咪已經接洽除咗蒙牛（02319）以外嘅新客？華主席淨係笑笑口話不便透露。睇嚟呢個市場較關心嘅集團銷售對象問題，依然係個謎。
今次股東會嘅投票表決結果，絲絲眼見，有成23.13億股數嘅股東反對公司配發、發行及處理最多佔公司已發行股本20%的新股，即58.48%與會股東投票否決咗呢項普通決議案。今次股東會似乎未算係一帆風順。