絲絲講場：高精密小股東鬧爆
今年八月，中國高精密（00591）用業務涉及「國家機密」呢個理由，嚟解釋點解提供唔到財務數據畀核數師，令港交所（00388）准佢復牌，之後轉嗰頭又畀證監會勒令停牌，絲絲聽聞咁樣搞到唔少小股東好唔高興，公司尋日開股東會，果然有小股東專登搭飛機嚟表達不滿，兼要問個究竟。
上海散戶來港投訴
尋日股東會開完，有幾個小股東走咗之後，會議場地入面就傳出吵鬧聲，絲絲都未瞄得真係乜事，好快就平靜落嚟。後尾有兩個小股東同絲絲呻咗兩句，其中一個仲係專登由上海飛落嚟嘅添。
佢哋異口同聲話，覺得今次係監管機構嘅責任，當初都係因為信港交所已查清楚，佢哋先入市，點知跟住又停牌！佢哋仲話，管理層雖然喺會上話有信心復牌，但就冇畀到時間表。
佢哋仲建議，如果繼續咁搞落去，不如私有化咗間公司好過，不過就一定要用招股價嚟私有化先至夠公平咁話。高精密○九年十一月上市，招股價4蚊，停牌前只係1.24元，小股東數口真係精。
主席：點會冇信心復牌
嗰頭見公司主席黃訓松走出嚟，絲絲立即問佢有冇信心復牌？佢就只係掉低咗句「點會冇信心」，然後就急急腳走。
絲絲睇嚟，今次股東會上嘅投票，唔多唔少都反映咗小股東嘅怒氣，會上面兩條有關授權公司發行新股嘅決議案，贊成通過嘅票數都唔夠七成。
余詩韻