俊文寶石（08351）啱啱公布咗新嘅人事任命，就係搵咗陳子政同周梁淑怡出任公司嘅獨立非執董，其中陳子政仲會做埋審核委員會主席、薪酬委員會嘅成員、同埋提名委員會嘅成員。
陳子政依家係港交所（00388）嘅獨立非執董，亦係Mongolian Mining Corporation（00975）嘅獨立非執行董事兼審核委員會主席。
查實佢喺銀行界嘅資歷一匹布咁長，銀行界冇人唔識得呢位「炒手」——既係盤房炒手，又入得廚房炒幾味。
佢最經典嗰役係由美資行花旗銀行工作27年後，跳槽去中銀香港（02388），返工兩個月，突然以出現抑鬱症病徵而請辭，消息嚇親好多人。事後佢都話可能喺美資行期間，頻頻做救火先鋒，積積埋埋搞出抑鬱病都唔知，好彩依家冇事，仲愈來愈活躍添。
今次陳子政會喺俊文寶石擔任獨立非執董兩年，每年收取嘅董事袍金18萬元。至於周梁淑怡就會出任獨立非執董兼公司主席，每年袍金60萬元。
余詩韻