內地體育用品股先後公布咗第三季業績後，叫做可以鬆一口氣，不過，贊助活動就仍然一浪接一浪，好似特步國際（01368）咁，日前先完成首屆廣州馬拉松賽嘅鑽石贊助商兼唯一指定運動裝備贊助商宣傳活動，嚟緊又要着手搞明年一月贊助嘅廈門國際馬拉松，二月就輪到香港渣打馬拉松呢個國際體壇盛事。
特步創辦人兼主席丁水波尋日仲特登嚟咗香港打點一下贊助細節，仲係即晚就離港，絲絲聽到都覺得忙。不過丁總就愈做愈起勁，仲話想加多啲運動賽事嘅贊助，尤其係同跑步有關嘅。至於特步贊助嗰件渣打馬拉松戰衣會係點嘅款，就點都要等到明年二月中跑手拎衫嘅時候，先可以揭盅。
特步喺香港贊助馬拉松，都係想有多個平台做品牌宣傳，佢哋今年確實已引起咗本地唔少回響，不停畀人問特步幾時開拓香港市場，尋日丁總講到明：「家陣未係時候，不過將來一定會有適合香港人買嘅產品。」聽丁總咁講，絲絲就更超想知明年件馬拉松戰衣會係點嘅樣。
余詩韻