絲絲講場：熔盛棄家族求「長生」
身兼熔盛（01101）同恒盛（00845）大股東嘅張志熔早幾日「裸退」，市場都愕一愕，熔盛新主席陳強接任後，尋日首次公開露面，絲絲同佢傾咗幾句。
陳總話，張生雖然一早都同佢講過有意退任，但佢聽到呢個消息之後都感到有啲意外，更加估唔到連張生嘅爸爸張德璜都離開埋董事局；陳總話自己之前都有勸過張生，希望有張家嘅成員可以留低。
決策交外人 民企榜樣
不過，聽陳總再講，話其實張生一直都有退任嘅諗法，因為張生想將熔盛打造成百年企業，如果單靠喺家族入面一代傳一代，好難達到呢個目標，將公司交畀專業人士打理反而比較好。講到最後，陳總仲大讚張生今次嘅決定，為中國民企立咗一個好榜樣。
張志熔始終仲係熔盛大股東，市場比較關心佢會唔會減持公司股份，呢一點，陳總答話真係唔知，不過佢認為張生對熔盛非常有感情，會繼續支持公司發展喎。
咁陳總自己，又或者其他管理層會唔會增持呢？佢只係答話對公司嘅發展充滿信心。咁咪即係無答到囉？
余詩韻