政府為幫樓市降溫而推出買家印花稅同加強版嘅特別印花稅之後，好多人都話睇唔通樓市，昆士蘭按揭保險（亞洲）尋日請咗黃遠輝（Stanley）同黃元山（Stephen）兩個資深銀行家出嚟「唱雙簧」，Stanley仲話自己同Stephen個名縮寫都係S. Wong，所以好同意Stephen講嘅嘢。
Stanley依家身兼長遠房屋策略督導委員會成員同房委會資助房屋小組主席公職，一出手就講過去六十年公共房屋政策，仲話政府出完招之後，樓價應該會跌返去較合理水平。
咁點為之樓價合理水平？Stanley話今年樓價升咗20%，打回原形就差唔多，即係要跌20%。絲絲所見，在場過百銀行家即時對佢嘅睇法議論紛紛；喺旁邊嘅Stephen更加即刻「解畫」，話Stanley有房屋政策公職在身，咁講得即係樓價如果唔跌，政府肯定再出招；Stanley無反駁，只係微笑不語。咦，似有玄機喎。
兩個S. Wong睇法唔同嘅，係外圍經濟，Stanley話對歐洲好悲觀，Stephen就對美國經濟保持樂觀，仲提醒大家，依家個個都預期低息期持續，反而意味真正加息嘅日子已經愈來愈近，叫大家小心利率風險。
余詩韻