Market Insight：味千抽升趁機換貨

自三月份總理溫家寶預告中國經濟將由重量轉向重質，中央放棄「保八」，A股至今失去兩成市值。除出口術外，郭總控制範圍內仲有乜計仔？近日芬佬界消息話，內地有可能取消佣金限制，雖然古勝向來信賭場送叉燒飯，可以吸引更多賭仔入場，但觀乎滬市成交額每況愈下，形勢本已麻麻，再加埋傳聞，博反彈既然咁多選擇，暫時當睇少中信証券（06030）及海通證券（06837）兩隻都無所謂。

港股在「奧巴馬話財政懸崖有得傾」與「A股未止瀉」兩單新聞中，選前捨後者，期指結算日港股收市升213點報21,922點，主板成交544億元，是近三星期最多。收市後，金管局兩度入市干預港匯，注資顯然一次多過一次，昨日共注資58.13億元，下星期一銀行體系結餘因此升至1,897.92億元。

放大圖片

放大圖片

熱錢多勿做空軍

假如十二月二十一日唔係世界末日，今年仲有二十個交易日，進入傳統聖誕前低成交期，在港匯熱錢極為充裕，今年「包晒頭」的基金有相當多粉飾業績的誘因，唔能夠抹殺大市乾升的可能，就算口淡淡唔信邪，大家短期避免做空軍為宜。

一堆業績，創維數碼（00751）半年賺5.69億元升23.4%，中期息由5.5仙加到7仙，期內毛利率輕微收窄1.1個百分點至20.1%。公布業績後捧場客恍如鳥獸散，股價急挫0.43元報4.15元，睇業績與投行預測的6.18億元大約有8%出入，古勝估計毛利率回落殺傷力更大，唔知係歷史重演，去年創維中期業績一樣估高開低，最終由績前4元殺落約2.7元，估計全年賺14億元，市盈率8.2倍，估計3.8至4元應已差不多。

基本因素未好轉

珠寶股六福集團（00590）半年賺5.58億元跌22.4%，營業額則升7.4%至59.2億元，收入升利潤跌，緣於鑽石首飾毛利率回復到一○年「正常」水平，毛利率下降2.9%至21.6%，整體上業績較市場預期好。按年報顯示，下半年聖誕及新年乃珠寶首飾銷售旺季，過去三年佔全年盈利65%、63%及46%（主要是金價回落影響），全年賺12億元的預測可能有點保守，一三年市盈率11倍樓下，昨日抽升後現價仲係吸引。

招股定價進取的翠華（01314），影子股效應帶起兩隻快餐股，火燒冷灶，就連久沉的味千（中國）（00538）都見被炒高，昨抽升0.97元收報6.97元，乜仇都報晒。

豬骨湯事件之後，味千股價沉寂多時，今年累積下跌17.4%，早前的第三季同店銷售報告，香港及內地分別只得0.5%及2.3%增長，銷售收入升12.4%，骨湯事件加上內地反日情緒高漲，味千已經打定輸數，今年店舖數目維持一一年的670間左右，不求大變。

睇番大行估今明兩年，賺1.42億及2.23億元（一三年市盈率32倍），加埋都唔夠一○年高峰期4.47億元。雖然業績見底，難怪高盛鬼咁淡，喊沽不特止，仲睇到2.7元咁低。按基本因素，無乜理由揀味千，唯一解釋，係自三月以來味千沽空比持續高企，咁掃法十足十補倉，年初被綁嘅應該趁機換貨。

東風搭轉順風車

雖然吉利汽車（00175）遭高盛大手減持，但消息無阻炒家翻撻汽車股，長城汽車（02333）抖完氣再創52周新高25.9元，廣汽（02238）亦急起直追，股價升6.8%；華晨（01114）及東風（00489）算係升得溫和，升幅分別為1.4及1.8%。睇嚟臨近年尾，又係消費旺季，加埋今年汽車業喺上大人力推補助措施支持下維持穩定發展，車企盤數應該見得人，所以炒家放心炒作。東風整固過後升穿周初高位11.48元的話，下一阻力位睇12.2元。

古勝