絲絲講場：旭輝背後有猛料中堅
內房股嚟香港上市，要成為受歡迎嘅大眾愛股，背後唔少得一、兩位有經驗有實力嘅中堅人才幫吓手。主要喺上海、北京等一線城市發展嘅旭輝（00884），啱啱喺主板掛咗牌。尋日嘅上市儀式，絲絲除咗見到過檔幫手攪上市嘅龍湖地產（00960）前首席財務官（CFO）林鉅昌之外，仲有李寧（02331）前CFO 陳偉成，都去咗旭輝做獨立非執董。
卡撒天嬌老闆有覺好瞓
絲絲睇番，呢位前「星級」CFO，自離開李寧之後，主要都係擔任非執董或獨董咁，包括運動服裝股特步國際（01368）非執董、化妝品股莎莎國際（00178）、及合生元（01112）嘅獨立非執董。
至於林鉅昌，絲絲之前同林總傾偈時聽佢講過，由於佢哋公司有唔少喺龍湖做過嘅員工，所以就識得林鉅昌，仲搵埋佢做私人顧問。
除咗旭輝之外，床上用品股卡撒天嬌（02223）亦係尋日掛牌，佢哋係做床上用品嘅，送畀港交所嘅紀念品自然都係同床有關，就係一張好舒服嘅「床仔」。卡撒天嬌全日股價表現都幾理想，佢哋老闆今晚應該覺得張床特別好瞓。