絲絲講場：周松崗新舊東家齊獲獎
會計師公會每年都舉辦「最佳企業管治資料披露大獎」，表揚係企管資料披露方面表現優異嘅上市公司或公營機構，呢個獎項對得獎機構嚟講真係好大鼓舞，今年嘅頒獎禮就喺尋日舉行，絲絲都去咗睇吓，仲見到有個人零舍開心，就係今次做頒獎嘉賓嘅港交所（00388）主席周松崗。
港交所攞恒指白金獎
何解？事關港交所同埋周總嘅舊東家港鐵（00066），今年齊齊攞到獎：港交所攞到恒指成分股組別嘅白金獎，港鐵就攞到同一組別嘅金獎。周松崗做頒獎嘉賓梗係特別開心啦，絲絲見佢笑到簡直見牙唔見眼。
港交所既然係市場監管者，自然要以身作則，企管資料披露有高水準自然不在話下；其實港鐵一樣係呢個大獎嘅常客，曾經做過港鐵行政總裁嘅周松崗可算係功不可沒。
絲絲相信，周松崗一定會令港交所嘅企管資料披露水平「百尺竿頭、更進一步」，事關周總過完頒獎癮，話唔定下次想過吓攞獎癮呢。
余詩韻