絲絲班私募基金friend最近開口埋口喺度講世界糧食短缺，奇怪？佢哋幾時變得咁社會性？聽真啲，原來係話市場上依家無乜好投資，佢哋就睇好農產品，仲話商品大王羅傑斯都睇好，無理由唔跟咁話。咦！又好似係喎，最近全球最大私募基金黑石就想買澳洲最大嘅養雞場，連中國首富宗慶后嘅娃哈哈都傾緊要去澳洲大手投資搞養牛場。
黑石今次嘅收購，係拍住內地民企新希望一齊上，佢哋睇中嘅，係澳洲最大養雞場Inghams Enterprises，預計收購金額去到15億美元。今次收購成功嘅話，就係黑石第一次收購澳洲企業。新希望本身亦係內地其中一個最大嘅肉類、蛋類、奶製品供應商。好似Inghmas呢類澳洲農產品公司，過去兩年一直好搶手，主要係貪呢啲公司嘅產品夠好賣、現金流穩定，可以抵禦到經濟放緩嘅影響。所以，今次Inghams單deal，最初仲有其他人爭，好似私募基金貝恩資本同KKR，香港駿麒投資同埋泰國嘅CP食品都好似出過手競購。
至於娃哈哈，佢哋嘅集團董事長宗慶后已經去過澳洲3次視察環境，打算投資2億澳元（約2.08億美元）喺澳洲搞養牛場同奶粉加工廠。睇嚟最近連大型內企都鍾情投資農產品。絲絲就覺得，對於以農立國嘅中國人嚟講，投資農業可能算係還原基本步。