絲絲講場：張天生加料 賀壽慶金婚
絲絲同唔少金融界嘅老友記，最近都陸續收到資深經紀張天生下月喺鄉下順德搞嘅生日演唱餐舞會行程表，一睇就有大發現，生日演唱會將會「加料」，就係當日仲會慶祝埋張天生伉儷金婚紀念，即係結婚50周年，喜事打孖上，真係可喜可賀。
話說農曆十月廿七日係張天生嘅生日，而農曆十月廿八日就係佢嘅結婚紀念日，絲絲心諗，兩個咁重要嘅日子相隔咁近，一來可以一齊慶祝，二來老公又肯定記得，老婆包唔會「詐型」。而今年更加係結婚50周年，就更令人難忘。講真，一對夫婦能夠攜手共度50個寒暑，今時今日真係好難得，絲絲真係好羨慕好羨慕！
財圈老友聚首順德
講番呢個生日演唱會，將於十二月八號同九號喺順德舉行，聽講張天生籌備咗成半年有多，屆時會邀請200幾位金融界朋友到順德慶祝，仲會安排旅遊車接送，非常大陣仗。行程總共兩日一夜，各位金融界老友記今次除咗有歌聽、有舞跳之外，肯定有美食伴隨，貫徹張天生嘅「美食人生」。
余詩韻