內地移動通訊服務嘅爭客戰打得火辣辣，3G服務月費入場門檻愈劈愈低，絲絲呢個禮拜初去咗上海一轉同朋友食大閘蟹，就見到聯通（00762）喺當地推出名為「沃3G慧卡」嘅新服務套餐，最平嘅入門計劃，盛惠只係6蚊人仔！咁，即係3G服務嘅入場月費門檻比之前平咗70%！睇嚟，新一輪嘅移動通訊服務減價戰，離爆發不遠矣。
單以3G服務嚟講，就係中移（00941）、聯通、同埋中電信（00728）三分天下。聯通今年年中推出嘅20蚊人仔每月100MB嘅3G套餐，更被公認為移動服務劈價戰嘅第一槍。
至於聯通剛推出嘅呢個「沃3G慧卡」之所以可減到6蚊人仔，聽講話佢嘅話音同數據服務，全面改為按用量嚟計，嚟吸引使用量偏低嘅用戶都嚟用3G服務。除咗入門套餐外，「沃3G慧卡」亦有16蚊人仔嘅100MB、同26蚊人仔嘅300MB等服務計劃，聯通仲唔係擺明大劈價！
雖然3大電訊商管理層經常話唔係要用「過激」嘅價格戰嚟搶客，講係咁講，現實還現實，地方分公司為咗力爭上客目標，時不時都會「人減我又減」。絲絲睇嚟，3G愈全面普及，呢個情況就只會愈演愈烈。