絲絲講場：趙善銓見證中強日落

隨住內地財富急速增長，好多私人銀行都想吸納中國客戶，瑞士盈豐銀行亞太區行政總裁趙善銓（Albert）同絲絲講，喺八十年代，去瑞士開私人銀行戶口嘅，好多都係日本人，Albert話當時男人去瑞士開銀行戶口，老婆就去打Botox，但依家去瑞士開戶嘅，就多數係內地人，唔知中國女士有無日本女士咁愛美呢？

瑞士盈豐銀行係一間純私人銀行，喺香港宣傳唔算多，Albert解釋話，佢哋嘅客戶大部分都係由現有客戶轉介，知道客戶資金唔係黑錢，會安心啲喎。又係嘅，私銀客戶嘅資金規模動輒都成千萬上落，對業務審慎啲，小心駛得萬年船。

對於銀行嘅知名度未去到人人識，Albert就以手錶做比喻，「大部分名錶價錢都好貴，但係有啲唔出名嘅手錶，都可以賣到幾十萬，我哋銀行就睇準呢個市場定位，致力做一間穩健保守嘅私人銀行。」

又係，頂級好嘢確實未必要通街人人識。計絲絲話，如果間間銀行都好似佢哋咁穩健，就唔會有金融海嘯。

余詩韻