中日關係持續緊張，日資基金公司日興資產管理為改善兩國關係，前排就史無前例咁為兩地學生搞咗一個「全球基金王」模擬投資比賽，等佢哋有機會感受投資市場氣氛之餘，仲可以進行交流。
日興喺一○年首辦活動後，一向都喺中國、日本、美國搞區內季制賽，今次「國家賽」目的就係想做兩地關係潤滑劑。
話說參加對象係中日兩地讀緊高中至大學嘅學生，佢哋要喺兩個月間，運用價值1億元人民幣嘅虛擬資金，喺環球35個國家股市搵投資機會，不過最多只可以買20隻指數基金。
兩地分別有三組進身決賽，然後兩國勝出代表再分高下，日本同中國學生分別去咗日興駐東京同香港辦公室做Presentation，過程以視像直播。
評判根據投資結果、風險策略、分析能力等多項因素評審，而「亞太區基金教父」、日興資產管理亞洲區總裁裴布雷亦都有份畀分。
雖然結果日本贏咗，但中國區勝出代表都可參觀日興東京辦公室，都值得開心吖！