絲絲講場：陳秉強「baby」出世有交代

港交所千辛萬苦催谷下，尋日終於有第一隻「雙幣雙股」出世，身為港交所人民幣產品專責小組主管嘅陳秉強，應該可以鬆一口氣！大家都知道，陳秉強嘅「老闆」即係港交所行政總裁李小加，一向好緊張有冇企業發行人仔股票，差不多好似係李小加自己個baby咁着緊，依家人仔股票終於順利出台，對各方總算有所交代！

雖然講到底有冇人仔股票，係取決於企業本身，但李小加會唔會對陳秉強有獎勵呢？陳秉強好低調咁話，李小加輕輕拍咗吓佢嘅膊頭，叫佢要再努力！

雖然李小加只係輕輕一拍，但喺職場多年嘅人都知，獲老闆鼓勵無疑係對員工嘅一份肯定，陳秉強喺港交所肯定前途無限！

話時話，港交所同上交所、深交所合組嘅合資公司「中華證券交易」，陳秉強擔正大旗做呢間新公司嘅總裁，話佢係港交所「大紅人」都應該冇乜錯！

人仔股票成功出世，咁陳秉強自已點慶祝呀？佢話唔會咁易沾沾自喜，但會同老婆食飯慶祝，絲絲就多口問佢會喺邊度食呀？點知佢反高潮話返屋企食！絲絲心諗，呢餐應該由佢親自下廚，孝敬老婆大人啦！