近排好多人都鍾意喺微博爆料，絲絲早幾日上微博，就見到有網民言之鑿鑿咁話，萬科董事長王石同太太王江穗分居多時，仲話王石同一位80後內地女演員田樸珺有親密關係添，搞到王董要透過個人微博，叫大家唔好打爛沙盆問到底。
絲絲估唔到嘅係，形象健康、曾經用六年時間征服七大洲最高峰同南北兩極（7+2）壯舉嘅王石，今次竟然傳出婚變消息。有網民發微博話，證實王石已經同王江穗離婚，但財產分配方面就未有定奪。
至於被傳介入兩人婚姻嘅田樸珺係一位內地演員，爆料嘅網友就話佢同王石喺商學院認識，田樸珺擔任上市公司顧問時，亦曾經向王石請教房地產嘅問題；幾年前田樸珺亦不避忌指出，最欣賞嘅商界精英就係王石。
消息傳出後，王石透過中國地產嘅官方微博作出回應，表明自己無背叛家庭，更強調社會都應該保障企業家私隱，言下之意都係希望大家唔好問咁多。而萬科發言人亦講到明，對管理層嘅私生活一律不知情不回應，若有重大敏感嘅消息，便一定會公布。絲絲就唔知道消息屬真屬假，但係事件喺網上引起嘅關注，簡直媲美娛樂界巨星，睇嚟王董都要花啲時間澄清成件事喇。
余詩韻