港人工作時間長，返到屋企都想抖吓，有請外傭幫手打理家務嘅當然冇問題啦，但冇嘅話，搵個家務機械人幫吓手又得唔得呢？大家唔好以為絲絲做嘢做到傻咗，查實真係有公司開始做相關研發。
喺創業板上市嘅天時軟件（08028），尋日宣布旗下公司新信薈智信息產業，已經同美的春花電器訂立研發合作協議，開發小型家用電器移動機械人，仲話項目嘅所有研發成果將於明年八月二十日或之前交付美的。究竟呢個機械人可唔可以幫手煮飯、掃地、開關冷氣、定係有其他用途？絲絲真係好期待！