上個月啱啱出獄嘅廣東科龍電器前董事長顧雛軍再有新動作，佢尋日寄咗封快遞信件畀中國證監會紀委書記黎曉宏，希望可以為自己翻案。
內容係為當年入獄一事，再次要求中證監公布七年前科龍被立案調查嘅原始罪名，同要求中證監公開當年收到涉及2.76億美元擔保嘅舉報信。
顧雛軍喺今次封信度話自己承擔咗「莫須有」罪名，仲提到當年科龍畀中證監調查，令到供應商同銀行擠兌，公司被迫停產同埋產生咗37億元嘅巨額虧損，令到兩地股東造成巨大損失。
顧雛軍喺○五年被捕，被控虛假註冊、挪用資金等罪名，被判入獄10年。其實佢放番出嚟之後，已用過不同形式伸冤，又點名包括中證監前副主席范福春在內嘅一批官員，當年利用職權陷害佢，同侵奪科龍股權。
之後佢又喺微博發表兩個訴求，要求中證監公布科龍被立案調查嘅原始罪名，同埋公布當年收到涉及2.76億美元擔保嘅舉報信等嘅原始證據，話希望科龍案可以真相大白，但就收唔到中證監回應，覺得好無奈。既然微博呢條路行唔通，惟有試吓寄信啦！
余詩韻