絲絲尋日喺東盟主辦嘅研討會上，竟然見到稀客，就係滙控（00005）集團行政總裁歐智華。如果絲絲無記錯，今次應該係自從滙控捲入洗黑錢醜聞之後，歐智華首次現身香港。滙控係今次活動嘅贊助機構之一，除咗歐智華，滙豐亞太區總裁王冬勝亦有出席。
滙控嘅洗黑錢醜聞仲未完結，加上最近又傳聞佢哋裁減投行部門員工，所以當歐智華出席完大會為嘉賓而設嘅午宴之後，絲絲即刻撲過去，諗住八吓。不過，佢一離開會場就急急腳走人，並無回答任何提問。
佢哋係贊助機構，自然會講吓嘢。歐智華負責發言，題目離唔開東盟，佢話東盟成員國嘅經濟持續錄得增長，為銀行帶來龐大商機，例如成員國大力推動基建項目，需要銀行提供融資服務；另一方面，佢建議東盟要繼續推行改革，包括鞏固金融系統、完善監管體系，同埋進一步推動貿易自由化，咁先至可以令經濟持續增長。