新一年度「胡潤房地產富豪榜」又喺尋日新鮮出爐，高居榜首嘅係擁有450億元（人民幣‧下同），從事商業地產嘅王健林。絲絲發現，喺富豪榜頭五位，有三個係富婆，姊妹們終於威番次啦！
「2012女首富」呢個名銜成為吳亞軍嘅囊中物，佢嘅財富達350億元，但已比上年少咗50億元，吳亞軍係歷年房地產榜中排名最前，白手興家嘅女強人。而第二位富婆係排喺第三嘅陳麗華，佢坐擁330億元身家。
而今年排喺第五嘅楊惠妍，佢喺○七年房地產高峰期，揸住1,300億元財富成為房地產首富，但房價持續下降，令佢得番250億元財富，比○七年跌咗81%。
唔單止吳亞軍同楊惠妍嘅財富縮水，前50位地產富豪嘅平均財富都比上年跌咗5.2%，比○七年高峰更加跌咗17.4%，不過呢個榜淨係計佢哋房地產部分嘅財富。雖然整體嚟睇係跌咗，但今年都有8位新人上榜，而金輝集團嘅林定強就以140億財富成為今年嘅新人王。