利豐（00494）新班底查實喺舊年已同大家見過面，連利豐第四代接班人、馮國經阿仔馮裕鈞（Spencer）都一早入埋局，點知尋日利豐收市後突然宣布，邀請咗前花旗銀行香港企業及投資銀行部門主管林崇禮加盟，擔任財務總監睇住公司盤數，令利豐高層管理團隊再添一名猛將。
絲絲聽花旗香港發言人講，花旗同利豐都有成百年關係，雖然畀對方請走咗個人才，不但無唔開心，仲覺得好榮幸，話呢個舉動講得上係兩間公司關係嘅伸延。
利豐一早定咗大計，今年會繼續搵收購對象，但近期嘅收購交易都係傳多做少，可能係等埋林崇禮，幫手計數，先落實固有業務同收購策略。唔講唔知，利豐發言人尋日先同絲絲講，財務總監嘅職務不嬲都由Spencer負責，不過就無落Title。
既然Spencer今年五月股東會後正式執掌集團營運總監，不但要負責集團全球營運支援，仲要管埋財務、會計、人力資源同資訊科技等。唔怪得之Spencer要搵多位賢能之士幫手啦，所以呢位將於下月五日履新嘅新CFO都要向Spencer匯報。
林崇禮來頭都唔嘢小，先後喺花旗銀行、摩根士丹利、永道會計師事務所任職，由會計、審計、企業融資到資本市場交易等都無一不曉，相信利豐都係睇中新CFO購併及推動財務策略方面有卓越成績。
余詩韻