Market Insight：百貨股暫勿沾手

雖然A股做好，可惜對港股無補於事，港股升勢基本集中在工行（01398）、中石化（00386）、中石油（00857）、中移（00941）及建行（00939）五隻股份身上，總共貢獻73點，佔大市升幅六成五。

基金經理買港股的態度審慎，相信同美國鋁業昨晚揭開美股第三季業績期序幕不無關係。

放大圖片

放大圖片

自從○八年次按風暴，聯儲局減息兼狂印銀紙，融資成本大減加上弱美元刺激出口，美國上市公司業績經歷連續11個季度增長，可是，放水的進補作用有遞減效應，分析員估今年第三季，標普500指數成分股業績，平均會出現2.7%倒退，是海嘯後最差。

內房股料重拾弱勢

華爾街怎去演繹本季業績，有待觀察，可是睇見美股在QE3後的sell on fact現象，股市升幅唔多，油價在需求疲弱下急挫，古勝多少擔心，一旦年底輪到美股由強轉弱，即使A股十八大前有中央力托，夾在兩市之間，港股仲係好難叻得去邊。

北京中原研究部統計數字顯示，黃金周前七日，內地54個城市合計簽約樓盤1.6萬套，比前一星期5.4萬套，大跌七成，上海房地產秋季展銷會，同樣旺丁唔旺財，人頭湧湧下假期首三天零成交。

今年「金九銀十」失效，內地銀行未有高調收緊信貸條件，但準買家已怯於經濟不明朗因素，四月開始的內地樓市小陽春，有可能在八月份結束。在十八大房產政策明朗化前，內房股相信都會繼續向下搵支持，碧桂園（02007）已連續五日出現陰燭，有趨勢下試50日線2.86元的防線。

黃金周內消費不旺

早輪WhatsApp廣傳一張黃金周假期彌敦道金舖小貓三幾隻的照片，前日旅發局數字證實，黃金周訪港旅客增長確遜預期，幾隻珠寶零售股未止跌，周生生（00116）及六福集團（00590）昨再跌2%及4%。中國商務部發表中秋加十‧一長假期全國餐飲、零售企業銷售額8,006億元人民幣，比去年十‧一黃金周增長15%，考慮到今年假期比去年多一日，而且目前內地零售股的估值，顯然增幅未足以令投資者感到安心。

百貨股銀泰百貨（01833）黃金周期間兩杭州店銷售下跌8.7%，股價昨急跌8.1%報8.21元，下星期管理層公布第三季營運數據及第四季度指引，屆時相信分析員都會有興趣，試一試百貨業水溫。回顧上半年，銀泰盈利增長13.7%至5.47億元人民幣，分析員預測下半年賺3.78億元人民幣，按年升11.1%唔算進取，但以今次黃金周表現，似乎仲有被下調可能，明年12至13倍PE唔貴，可惜內需疲態持續之下，基金博反彈相信寧取工業及資源股，短期吸引力不足。

百貨零售股風險同回報不成正比的睇法，同時適用於另外幾隻估值較同業高，第四季營運表現可能未達市場預期的股份，觀乎金鷹商貿（03308）及百麗國際（01880）昨日成交增加下沽壓沉重，暫時仲係避免沾手為妙。

中石化可睇位上車

昨日升市，藍籌股中升幅最大嘅係中石化（00386），主要係市場盛傳新嘅成品油定價機制快將出台，屆時將會縮短調價周期，調價頻率將會加快。

古勝昨見中石化股價以大成交突破7.5元阻力位，高位曾見7.74元，收報7.64元，升幅3.8%，成交額增至14.3億元，MACD現雙牛利好。目前其股價主要阻力位在250日線7.83元，若能以大成交攻破，目標可上移至今年五月初高位8.3元水平，短線回吐守7.2至7.4元水平承接仍可留意上車機會。

近日有股仔變身狂炒，華藝礦業（00559）係其中之一，日前公司訂立諒解備忘錄，斥資2.6億元收購國藏酒莊全部股權，進軍內地酒業市場，難怪復牌後輕微回調一日，即再度發力砌上，聞說有基金求貨，礙於近日升勢頗急，如見顯著回吐，不妨小注跟進。

古勝