近期樓市錄得價量齊升；Prof. J開始認清一點：政府冇可能係呢幾年間，迅速有樓宇供應推出市場。為免捱貴租，好多人都開始「寧供勿租」，喺低息時代盡量享受住低息嘅優惠也！
近來要數樓市新聞，最出位莫過於「將未完工樓宇推出市場，預先兜售」嘅建議。建議嘅原意係想將供應量以「預售」方式推出市場，解決市民最緊迫嘅需要。呢個問題在於「銜接」。喺未完工前已收到款項，會否令施工質素下降？買咗「預售」樓宇又未有樓住，預售樓宇又存在多少嘅折讓成分，去彌補佢哋嘅「機會成本」呢？
政府處理樓市嘅問題可以話入咗死胡同；增加資助就等於令市民多咗錢買樓，反而會助長樓市中短期間嘅升勢；增加供應時，承建商大手洽購建築材料，令建築成本大幅上升，結果令市民捱貴樓。要解決呢個問題，唯一可行方法，似乎係將唔同級別嘅樓宇拆分，然後喺政府監管之下，將佢哋全面證券化。
如果政府可以親自主理一部分房產信託基金（REITs），等於將一個需要龐大資金嘅遊戲，拆分成為細份，令市民可以利用呢種金融工具，減輕自己對樓價上升嘅恐慌。另一方面，證券化後嘅房產基金，可以推出洐生工具，促進市場交易，利用金融界嘅多元化，去化淡樓價問題。
當然，金融市場只可以令買賣雙方係時間銜接上做得更加好，令資源配套更順暢，但絕對唔會單靠金融市場就解決到民生問題。治本嘅方法，仍然係努力做好規劃，令市民能「各安其居」，才可「再樂其業」。
香港大學電子金融服務榮譽助理教授 徐燦傑