俗語有云，人怕出名豬怕壯，DoubleLine Capital行政總裁岡拉克（Jeffrey Gundlach）呢期好紅，賊仔好識貨，揀佢間屋嚟爆竊，偷晒佢啲心頭好，惟有懸紅捉賊，所以話呢，錢解決到嘅問題，就唔係問題啦！
有「新債王」之稱嘅岡拉克，上個禮拜出trip，位於加州Santa Monica嘅豪宅，畀賊仔入屋爆格，據悉損失財物總值逾1,000萬美元（約7,800萬港元），失竊嘅財物包括逾十幅Jasper Johns和Piet Mondrian等名畫、一輛保時捷Carrera 4S紅色跑車、五隻名錶（包括一隻Breitling）、名酒同小量現金，相信好多係新債王嘅寶貝。
差人話依家仲查緊，岡拉克心急尋回心頭好，懸紅20萬美元（約156萬港元），獎勵可提供線索捉賊嘅人，重賞之下必有勇夫，睇嚟應該好快捉到。
DoubleLine○九年先成立，過去一年淨吸資達220億美元，為吸金力第三嘅基金公司，最近岡拉克表示有意增加投資股票比重，同舊債王格羅斯睇法一致。
余詩韻