Market Insight：國美投機跟進

消息令基金風險胃納回升，西班牙及意大利十年國債孳息，回落至5.6厘及5.04厘，分別是今年四月及三月以來最低，較七月份高低7.62厘及6.59厘，回落2.02厘及1.55厘，歐債危機初步撫平，至少短期內對沖基金少了一個做淡藉口。

港股連升五日，恒指昨日再有217點進帳，最後收報20,075點，再無大型批股之下，主板成交503億元可算是配合升市。古勝中午飯聚，芬佬陳話近數日升市，基本上全無主題可言，所以佢都索性嚟一招亂石投林，有乜股票大落後而成交有異動都跟番多少。收市時所見，又確係無一個特別受追捧板塊，藍籌中較標青的友邦（01299）升2.3%，發改委加快審批軌道建設，安徽海螺（00914）回吐一日之後，又再砌過升4.8%，炒賣盤的星獅地產（00535）狂升48%。

放大圖片

放大圖片

放水機會五五波

業績見紅，七月時隊到開巷的國美電器（00493），近期矮仔上樓梯日日升，昨日進漲4.8%，唔經唔覺由今個浪底反彈55%，到底為乜炒高？從基本因素，第二季勁蝕5.68億人仔，同店銷售估計下半年會好過上半年，但講緊不過是跌幅收窄，股價由52周高位3.22元，跌掉四分之三，現價市帳率（估計全年業績見紅無市盈率）0.8倍，可能是唯一可取之處，當炒垃圾股跟番一轉無妨，但唔多啱需要尋根究柢的價值投資者。

昨晚蘋果公司新iPhone發布會，周五凌晨輪到聯儲局議息後聲明，相信唔少看官同古勝一樣，準備煲定咖啡「部」住電腦等消息。在下估計，今個月推出QE3機會只係五五波。

可睇少瓣航運股

事實上，即使再重複上一份議息聲明，繼續強調需要時「有招可出」都唔係壞事。瑞信環球策略報告話，QE1、QE2及OT，對上三次聯儲局出招的經驗，期間升幅最大股市係南韓、俄羅斯及台灣，升幅34.9%、26.6%及26.2%，由於今次QE3預期炒了好一陣子，六月低位計，這三個股市經已分別升11.3%、20.7%及9.7%，究竟美國印鈔因素已反映咗幾多？好難講，sell on fact風險增加卻是不爭事實。

中國是今年表現最差的主要市場，上周滬綜指才跌至2,029點的三年半低位，遠落後於憧憬放水的歐美市場。由上兩次QE，資金湧向天然資源的經驗，唔少人擔心油價回升（六月低位已累升27%），對中國出口製造業的成本壓力可謂百上加斤，通脹回升，也令人行推貨幣寬鬆空間進一步收窄。

俗語有云便宜莫貪，上個月試圖博航運股反彈，最終又要交學費。八月內地進口數字差到極，固然通地眼鏡碎，未來一兩個月是聖誕出貨高峰期，反映乾散貨運的波羅的海乾散貨指數，近兩個月由接近1,200點，回落到662點，差2.3%去到二月份的N年低位647點，此情此境並非好兆頭。內地大宗商品庫存積壓情況無改善，航運股的確未有運行，中國遠洋（01919）半年業績，勁蝕48.7億元人民幣比預期多出近五成之後，業績後沽空收斂，但反彈力度微弱，睇嚟乜都可以炒，唯獨航運股仲未係時候。

高追要量力而為

喺市場流動性未有大改善下，呢期升市成交未見明顯增加，板塊亦只係輪流炒作而已。好似煤炭股同電力股，昨日繼續玩搖搖板遊戲。周初急升嘅電訊設備股，回吐一日，昨日又再發力，反觀兩隻本地電訊股就喺摩笛追魂下回軟。至於鋼鐵、基建同水泥股，亦不過處於反彈浪中，上落格局未變，短炒有胡唔食罪大惡極！

藍籌股之中，昨日就留意到和黃（00013）股價重上牛熊分界線，成交增加。藍燈籠掛起，係咪意味住呢轉升市已屆尾聲，QE3威力係咪如大家想像般強，古勝亦都冇水晶球，只能着各位自求多福，高追宜注意風險，量力而為。

古勝