金占士呢排成日聽到港交所（00388）審批上市申請嚴咗，但其實好多個案只須要用common sense，都好容易發現到問題，據聞有間小型證券公司打算闖關，結果畀委員會否決咗，其實只要係行內人，都明白當中嘅手法。
主板上市最低要求，係過去三年盈利要夠5,000萬元，即係最近一年盈利有2,000萬元、前兩年合計有3,000萬元。
話說有間證券行交盤數出嚟，前兩年合計有三千幾萬，而舊年一年就賺咗成四千幾萬，咁肯定夠數啦，點知有證券業出身嘅上市委員一睇就覺得唔妥，發現呢筆盈利主要嚟自證券交易佣金，質疑佢舊年市道唔算太好，點解可以唔尋常咁突然多咁多成交？
其中一個懷疑，就係間行自己「搓波仔」做成交，產生大額嘅佣金收入，當中嘅「唔尋常」構成「合理懷疑」，結果就否決咗，相信間行要再申請用IPO形式上市嘅機會都好微。
金占士都做過證券行，知道好多老細為咗業績無咁肉酸，尤其依家市況慘淡，好多時都會「幫手」落啲買賣盤，如果炒股賺到錢又幫到自己公司賺吓佣，何樂而不為呢。
金占士